Saturday, June 7, 2008

ನನ್ನ ದನಿಗೆ ನಿನ್ನ ದನಿಯು - ಸೇರಿದಂತೆ ನಮ್ಮ ಧ್ವನಿಯು



ಹಿಂದಿ ಚಿತ್ರರಂಗದ ಮೊದಲ ಸಾರ್ವಭೌಮನಾಗಿ ಮೆರೆದ ಕುಂದನ್ ಲಾಲ್ ಸೈಗಲ್ ಕಾಲದಲ್ಲಿ ಈ ನಟರು ಬೇರೆ ಹಾಡುಗಾರರು ಬೇರೆ ಎಂಬ ಪರಿಕಲ್ಪನೆಯೇ ಇರಲಿಲ್ಲ. ಆತ ನಿರ್ಮಾಪಕನಾಗಿ, ನಿರ್ದೇಶಕನಾಗಿ, ನಾಯಕನಾಗಿ, ಸಾಹಿತಿಯಾಗಿ, ಸಂಗೀತ ನಿರ್ದೇಶಕನಾಗಿ, ಗಾಯಕನಾಗಿ ವರ್ಷಾನುಗಟ್ಟಲೆ ಬಾಲಿವುಡ್‍ನ ಆಳಿದ ಪ್ರಭಾವ ಹೇಗಿತ್ತೆಂದರೆ ಆ ಕಾಲದಲ್ಲಿ ಇನ್ನೂ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದ, ಮುಂದೆ ಬೆಳೆದು ಲೆಜೆಂಡ್‍ಗಳಾದ ಲತಾ ಮಂಗೇಶ್ಕರ್, ಮೊಹಮ್ಮದ್ ರಫಿ, ಕಿಶೋರ್ ಕುಮಾರ್, ಹೇಮಂತ್ ಕುಮಾರ್, ಇವರೆಲ್ಲರೂ ತಾವು ಸೈಗಲ್ ರೀತಿ ಹಾಡಬೇಕು ಎಂದೇ ತಮ್ಮ ಗುರಿಯಾಗಿಟ್ಟುಕೊಂಡಿದ್ದರು. ತನಗೆ ತಾನೇ ಹಾಡಿಕೊಳ್ಳುವ ಸಂಪ್ರದಾಯವನ್ನು ಆರಂಭಿಸಿದ್ದು ಮೊದಲು ಸೈಗಲ್ - ಬಾಲಿವುಡ್‍ನ ಪ್ರಪ್ರಥಮ ಸೂಪರ್ ಸ್ಟಾರ್.



ನಂತರದ ದಿನಗಳಲ್ಲಿ ಪ್ಲೇಬ್ಯಾಕ್ ಸಿಂಗಿಂಗ್ ಶುರುವಾಯಿತು. ಬಹಳ ಜನಕ್ಕೆ ಗೊತ್ತಿಲ್ಲ, ಕಿಶೋರ್ ಕುಮಾರ್‍ ಎಂಬ ಮಹಾನ್ ಗಾಯಕನ ಆರಂಭದ ದಿನಗಳಲ್ಲಿ ಅವನಿಗೆ ಮೊಹಮ್ಮದ್ ರಫಿ ಹಾಡುತ್ತಿದ್ದ. ನಮ್ಮಲ್ಲಿ ರಾಜ್‍ಕುಮಾರ್‍ರಂಥ ಅಪ್ರತಿಮ ಗಾಯಕರಿಗೂ ಹಿಂದೆ ಪ್ಲೇಬ್ಯಾಕ್ ಸಿಂಗರುಗಳಿರಲಿಲ್ಲವೇ? ಹಾಗೆಯೇ ರಫಿಯು ನಟ ಕಿಶೋರ್ ಕುಮಾರ್‍ಗೆ ಹಾಡುತ್ತಿದ್ದ. ಮುಂದೆ ಕಿಶೋರ್ ಕುಮಾರ್ ತಾನೇ ಹಾಡಿಕೊಳ್ಳಲು ಶುರು ಮಾಡಿದ. ಮೊಹಮ್ಮದ್ ರಫಿಯ ಧ್ವನಿ ಆಗ ಹೇಳಿ ಮಾಡಿಸಿದಂತೆ ಕುಳಿತಿದ್ದು ದೇವ್ ಆನಂದ್ ಎಂಬ ಹುಡುಗನ ಮುಖಕ್ಕೆ.



ಹೇಮಂತ್ ಕುಮಾರ್ ಮತ್ತು ಎಸ್.ಡಿ. ಬರ್ಮನ್ ಸಂಗೀತ ನಿರ್ದೇಶನದಲ್ಲಿ ದೇವ್ ರಫಿ ಜೋಡಿಯಲ್ಲಿ ಬೇಕಾದಷ್ಟು ಹಾಡುಗಳು ಜನರ ಮನಸೆಳೆದವು. ಈ ಕಾಲದಲ್ಲಿ ಕಿಶೋರ್ ಕುಮಾರ್ ಹಾಡುತ್ತಿದ್ದ, ಆದರೆ ತನ್ನ ನಟನೆಯಿರುವ ಚಿತ್ರದಲ್ಲಿ ಮಾತ್ರ. ಬೇರೆ ಯಾರ ಅಭಿನಯದಲ್ಲೂ ಅಷ್ಟು ಹುಚ್ಚುತನವಿರಲಿಲ್ಲ.



ಕಿಶೋರ್ ಕುಮಾರ್ ಬೇರೆ ನಟರಿಗೆ ಹಾಡಲು ಆರಂಭಿಸಿದ ದಿನದಿಂದಲೇ ರಫಿಗೆ ಒಬ್ಬ ನಿಜವಾದ ಸ್ಪರ್ಧಿಯಾಗಿದ್ದ. ಆದರೂ ಜನ ಇಬ್ಬರನ್ನೂ ಅಷ್ಟೇ ಆದರ ಮತ್ತು ಪ್ರೀತಿಯಿಂದ ಸ್ವೀಕರಿಸಿದರು. ಮುಂದೆ ಎಪ್ಪತ್ತರ ದಶಕದಲ್ಲಿ ಇಬ್ಬರ ಸ್ಪರ್ಧೆ ಬಹಳ ಎತ್ತರಕ್ಕೆ ಹೋಯಿತು. ಎಷ್ಟೆಂದರೆ ಒಂದೇ ಚಿತ್ರದಲ್ಲಿ ಒಂದೇ ಹಾಡನ್ನು ಇಬ್ಬರೂ ಹಾಡಿದ್ದು ಎಷ್ಟೋ ಉದಾಹರಣೆಗಳಿವೆ.

Tum bin jaaoon kahaan...




ದೇವ್ ಆನಂದ್ ಮತ್ತು ಕಿಶೋರ್ ಕುಮಾರ್ ತುಂಬಾ ಹತ್ತಿರದ ಗೆಳೆಯರೆಂದು ದೇವ್ ಆನಂದನು ತನ್ನ ಆತ್ಮಚರಿತ್ರೆಯಲ್ಲಿ ಬರೆದುಕೊಂಡಿದ್ದಾನೆ. ರಫಿಯಾದರೋ ಹಿರಿಯ ಗಾಯಕ. ಮೇಷ್ಟ್ರಿದ್ದ ಹಾಗೆ. ಅಷ್ಟು ಸಲಿಗೆಯಿಲ್ಲ. ದೇವ್ ಆನಂದ್ ಅಭಿನಯಕ್ಕೆ ಕಿಶೋರ್ ಧ್ವನಿ ಹೆಚ್ಚು ಹೆಚ್ಚು ಕೂಡಿತು. ಬಹಳ ಪ್ರಸಿದ್ಧಿಯನ್ನೂ ಸಹ ಪಡೆಯಿತು, ದೇವ್-ಕಿಶೋರ್ ಜೋಡಿ. ಆಗ ರಫಿಯ ಧ್ವನಿ ಹೋಗಿ ಸೇರಿಕೊಂಡಿದ್ದು ಶಮ್ಮಿ ಕಪೂರ್‍ನನ್ನು! ಈಗಲೂ ರಫಿಯ ಹಾಡುಗಳನ್ನು ಕೇಳಿದರೆ ರಫಿಯ ಮುಖ ನೆನಪಾಗುವುದೇ ಇಲ್ಲ, ಶಮ್ಮಿ ಕಪೂರ್ ಮುಖವೇ ನೆನಪಾಗುತ್ತೆ. ಅಷ್ಟರ ಮಟ್ಟಿಗೆ ಇವರಿಬ್ಬರ ಜೋಡಿ ಪ್ರಭಾವ ಬೀರಿದೆ. ಶಮ್ಮಿ ನಟಿಸುವುದನ್ನು ಬಿಟ್ಟು ಕಾವಿ ತೊಡುವ ದಿನದವರೆಗೂ ಇವರಿಬ್ಬರ ಜೋಡಿಯನ್ನು ಎಲ್ಲರೂ ಕೊಂಡಾಡಿದರು.



ದಿನಗಳುರುಳಿದಂತೆ ಎವರ್ ಗ್ರೀನ್ ಹೀರೋ ದೇವ್ ಆನಂದ್‍ನನ್ನು ಮೀರಿಸಿದ, ಮತ್ತು ಅಂದಿನಿಂದ ಇಂದಿನವರೆಗೂ ಯಾರೂ ಅಷ್ಟು ಮೆರೆಯಲು ಸಾಧ್ಯವೇ ಆಗಲಿಲ್ಲವೆಂಬ ನಟ ಪರದೆಯ ಮೇಲೆ ಬಂದ. ಈಗಿನ ಶಾಹ್‍ರುಖ್ ಆಗಲೀ, ಬಚ್ಚನ್ ಆಗಲೀ ಇಷ್ಟು ಮೆರೆದಿರಲು ಸಾಧ್ಯವೇ ಇಲ್ಲ. ಚೆಲುವ ಕೂಡ. ಆತ ರಾಜೇಶ್ ಖನ್ನಾ ಅಲ್ಲದೆ ಬೇರೆ ಯಾರೂ ಆಗಿರುವುದಕ್ಕೆ ಸಾಧ್ಯವಿಲ್ಲ. ರಾಜೇಶ್ ಖನ್ನಾ ಕಾಲದಲ್ಲಿ ಚಿತ್ರಕಥೆಗಳು ಎಷ್ಟು ಮಧುರಮಯವಾಗಿತ್ತೋ ಸಂಗೀತ ನಿರ್ದೇಶನ ಕೂಡ ಹಾಗೇ ಇತ್ತು. ಹಾಡು ಬರೆಯುವವರೂ ಕೂಡ ಅಷ್ಟೇ ಪರಿಣತರಾಗಿದ್ದರು. ಎಸ್.ಡಿ. ಬರ್ಮನ್, ಆರ್.ಡಿ. ಬರ್ಮನ್, ಶಂಕರ್ ಜೈಕಿಶನ್, ಓ.ಪಿ.ನಯ್ಯರ್ - ಇಂಥಾ ಘಟಾನುಘಟಿಗಳು ತಮ್ಮ ಉನ್ನತ ಶಿಖರದಲ್ಲಿದ್ದ ಕಾಲದಲ್ಲಿ ರಾಜೇಶ್ ಖನ್ನಾ ಮತ್ತು ಕಿಶೊರ್ ಧ್ವನಿ ಎರಡೂ ಒಂದೇ ಎಂದು ಭಾಸವಾಗುವಂತಾಯಿತು.



ಇವೆಲ್ಲಾ ಚಿತ್ರರಂಗದ ಒಂದು ದಿಕ್ಕಿನಲ್ಲಿ ಸಾಗುತ್ತಿದ್ದರೆ, ಇನ್ನೊಂದು ದಿಕ್ಕಿನಲ್ಲಿ ಈ ಯಾರ ಹಂಗೂ ಇಲ್ಲದೆ ಮೊದಲಿಂದ ಕೊನೆಯವರೆಗೂ, ಇಪ್ಪತ್ತೈದು ವರ್ಷಗಳೂ ಒಟ್ಟಿಗೆ ಇದ್ದ ಜೋಡಿಯೊಂದು ಎಲ್ಲರ ಮನಸೂರೆಗೊಂಡಿತ್ತು. ರಾಜ್ ಕಪೂರ್ ಮತ್ತು ಮುಖೇಶ್ ಜೋಡಿಯನ್ನು ಯಾರು ತಾನೇ ಮರೆಯಲಾದೀತು? ರಾಜ್ ಕಪೂರನೇ ಹೇಳಿದಂತೆ, "ನಾನು ಇಲ್ಲಿದ್ದೇನಷ್ಟೆ. ನನ್ನ ಧ್ವನಿ ಅಲ್ಲಿ ನಿಂತಿದೆ ನೋಡಿ..." ಮುಖೇಶನು ಬದುಕಿರುವವರೆಗೂ ರಾಜ್‍ಕಪೂರ್‍ಗೆ ಧ್ವನಿಯಾಗಿದ್ದ. ಇವರಿಗೆ ದಾರಿದೀಪವಾಗಿ ಶಂಕರ್ ಜೈಕಿಶನ್ ಸದಾ ಇರುತ್ತಿದ್ದರು.



ರಾಜೇಶ್ ಖನ್ನಾ ಕಾಲ ಮುಗಿದಿದ್ದು ಎಪ್ಪತ್ತರ ದಶಕದ ಅಂತ್ಯದಲ್ಲಿ. ಆಗ ಕಿಶೋರ್ ಕುಮಾರ್ ಧ್ವನಿಯು ರಾಜೇಶ್ ಖನ್ನಾ‍ನಿಂದ ಅಮಿತಾಭ್ ಬಚ್ಚನ್‍ಗೆ ವರ್ಗವಾಯಿತು. ಎಸ್.ಡಿ. ಬರ್ಮನ್ ಸತ್ತು ಹೋಗಿದ್ದ. ಹೇಮಂತ್ ಕುಮಾರ್, ಓ.ಪಿ.ನಯ್ಯರ್ ಎಲ್ಲಾ ನಿವೃತ್ತರಾಗಿದ್ದರು. ಆರ್.ಡಿ. ಬರ್ಮನ್ ಹೊಸ ಹೊಸ ಪ್ರಯೋಗಗಳನ್ನು ಮಾಡುತ್ತಿದ್ದ. ಮೊಹಮ್ಮದ್ ರಫಿ, ಮನ್ನಾ ಡೇ, ಅಂಥವರೇ ಅವಕಾಶಗಳಿಗೆ ಪರದಾಡುತ್ತಿದ್ದರು. ಬಪ್ಪಿ ಲಹರಿಯಂಥವರು ಮೆರೆಯಲೂ ಶುರು ಮಾಡಿದರು. ಅರವತ್ತನೆಯ ಇಸವಿಯ ಕಿಶೋರನ ಹಾಡುಗಳಿಗೂ ಎಂಭತ್ತರ ದಶಕದ ಕಿಶೋರನದೇ ಹಾಡುಗಳಿಗೂ ಅಜಗಜಾಂತರ! ಹುಚ್ಚು ಹುಚ್ಚಾಗಿ ಹಾಡುವುದನ್ನು ಕಿಶೋರ್ ರಾಜೇಶ್ ಖನ್ನಾ era ಮುಗಿಯುವ ಕಾಲಕ್ಕೇ ಬಿಟ್ಟು ಬಿಟ್ಟಿದ್ದ. ಗಂಭೀರವಾದ ಹಾಡುಗಳು ಅವನ ಪಾಲಿಗಾಗಿತ್ತು. ಅಮಿತಾಭ್ ಬಚ್ಚನ್‍ಗೆ ಕಿಶೋರನ ಧ್ವನಿ ಹೇಳಿ ಮಾಡಿಸಲಾಗಿತ್ತು. ಕಿಶೋರ್ ಕುಮಾರ್ ಇರುವವರೆಗೂ ಬೇರೆ ಗಾಯಕರು ನಂಬರ್ ಒನ್ ಸ್ಥಾನ ಗಿಟ್ಟಿಸಿಕೊಳ್ಲಲಾಗಲಿಲ್ಲ. ಇಂದಿಗೂ ಅಮಿತಾಭ್ ಬಚ್ಚನ್‍ಗೆ ಕಿಶೋರನ ಧ್ವನಿಯಷ್ಟು ಚೆನ್ನಾಗಿ ಬೇರೆ ಧ್ವನಿ ಹೋಲಿಕೆಯೇ ಆಗುವುದಿಲ್ಲವೆಂಬುದು ಸತ್ಯವಷ್ಟೆ.



ಲತಾ ಮಂಗೇಶ್ಕರ್ ಮತ್ತು ಆಶಾ ಭೋನ್ಸ್ಲೇ ಮಾತ್ರ ಈ ರೀತಿ ಯಾವುವೇ ಛಾಪುಗಳನ್ನು ನಟಿಯರೊಡನೆ ಸ್ಥಾಪಿಸಿಕೊಳ್ಳಲಿಲ್ಲ. ಅವರಿಬ್ಬರದು ಸಾರ್ವಭೌಮತನವಿದ್ದ ಹಾಗೆ. ನಲವತ್ತನೆಯ, ಐವತ್ತನೆಯ, ಅರವತ್ತನೆಯ, ಮತ್ತು ಎಪ್ಪತ್ತನೆಯ ಕೊನೆಗೆ ಎಂಭತ್ತರ ದಶಕವನ್ನೂ ಸೇರಿಸಿ ಎಲ್ಲಾ ನಟಿಯರಿಗೂ ಈ ಇಬ್ಬರೂ ಗಾಯಕಿಯರು ಹಾಡಿದ್ದಾರೆ. ಜೊತೆಗೆ ಇವರಿಗೆ ಸ್ಪರ್ಧಿಯಾಗಿದ್ದ ಸುರಯ್ಯಾ, ಗೀತಾ ದತ್ ಅಂಥವರನ್ನು ಸೋಲಿಸಿ, ಹೊಸ ಗಾಯಕಿಯರೂ ಸಹ ಚಿತ್ರರಂಗಕ್ಕೆ ಕಾಲಿಡಲು ಅಂಜುವಂತೆ ಮಾಡಿದ್ದ ಕೀರ್ತಿ ಇವರಿಬ್ಬರಿಗೆ ಸಲ್ಲುತ್ತೆ.



ಅರವತ್ತರ ನಂತರ ಸುಮಾರು ಮೂವತ್ತು ವರ್ಷ ಇವರಿಬ್ಬರೆದುರು ನಿಲ್ಲುವವರೂ ಇರಲಿಲ್ಲ. ಹೆಣ್ಣು ಧ್ವನಿಯೆಂದರೆ ಅದು ಲತಾ ಆಗಿರಬೇಕು ಇಲ್ಲವೇ ಆಶಾ ಆಗಿರಬೇಕಷ್ಟೆ. ಇವರಿಬ್ಬರಿಗೂ ತೀರ ವಯಸ್ಸಾದ ಮೇಲೆಯೇ ಕವಿತಾ ಕೃಷ್ಣಮೂರ್ತಿಯಾಗಲೀ ಅಲ್ಕಾ ಯಾಗ್ನಿಕ್ ಆಗಲೀ ಹಾಡಲು ಬಂದಿದ್ದು, ಹೆಸರು ಗಳಿಸಿದ್ದು.



ಕಿಶೋರ್ ಕುಮಾರ್ ಸತ್ತ ನಂತರ ಬಂದ ಗಾಯಕರ ಬಗ್ಗೆ ಅಷ್ಟೇನೂ ಆಸಕ್ತಿಯಿಲ್ಲ ನನಗೆ. ಉದಿತ್ ನಾರಾಯಣ್ ಆಮೀರ್ ಖಾನ್ ಜೋಡಿ ಕೆಲಕಾಲ ಪ್ರಸಿದ್ಧವಾಗಿತ್ತಾದರೂ ಆ ಮಟ್ಟದಲ್ಲಿ ಹೆಸರು ಮಾಡಲಿಲ್ಲ. ಸಲ್ಮಾನ್ ಖಾನ್ (ಈ ಹೆಸರು ಬರೆಯಲು ನನಗೆ ಮನಸ್ಸಿಲ್ಲ, ಆದರೂ ಬರೆದೆ) ಕೂಡ ಎಸ್.ಪಿ.ಬಾಲಸುಬ್ರಮಣ್ಯಂ ಧ್ವನಿಗೆ ಅಭಿನಯವನ್ನು ಹೊಂದಿಸಿಕೊಂಡುಬಿಟ್ಟಿದ್ದ. ಶಾಹ್‍ರುಖ್ ಖಾನನು ಕುಮಾರ್ ಸಾನು ಮತ್ತು ಅಭಿಜಿತ್‍ರ ಧ್ವನಿಗೆ ತನ್ನ ಅಭಿನಯವನ್ನು ಟ್ಯೂನ್ ಮಾಡಿಕೊಂಡಿದ್ದ. ಇವೆಲ್ಲಾ ಯಾವುದೂ ಅಂಥ ಹೇಳಿಕೊಳ್ಳುವಂಥದ್ದೇನಲ್ಲ ಅನ್ನಿಸುತ್ತೆ ನನಗೆ. ಅಲ್ಪಾಯುಷಿಗಳೆನಿಸುತ್ತೆ.




ಬೆಳಿಗ್ಗೆಯಿಂದ ಹಳೆಯ ಹಾಡನ್ನು ಕೇಳುತ್ತಿದ್ದ ನನಗೆ ಎಲ್ಲಾ ಗಾಯಕರುಗಳಿಗೂ, ನಟ ನಟಿಯರಿಗೂ ಒಂದು ನಮನ ಸಲ್ಲಿಸಬೇಕೆನಿಸಿತು. ಅದಕ್ಕಾಗಿ ಬರೆದನಷ್ಟೆ. ಇಲ್ಲಿ ಎಲ್ಲರನ್ನೂ ಏಕವಚನದಲ್ಲಿ ಹೆಸರಿಸಿರುವುದು ಅವರುಗಳ ಮೇಲಿನ ಪ್ರೀತಿಯಿಂದಷ್ಟೆ, ಅಗೌರವದಿಂದಲ್ಲ. ಅವರುಗಳ ಹಾಡುಗಳೆಲ್ಲವೂ ಮನದೊಳಗೆ ಮನೆ ಮಾಡಿಬಿಟ್ಟಿವೆ. ಜಗತ್ತಿಗೆ, ಜನಕ್ಕೆ, ನನ್ನಂಥವರಿಗೆ ಬೆಲೆಕಟ್ಟಲಾರದ ಉಡುಗೊರೆಯನ್ನು ಅಂದಿನವರು ಕೊಟ್ಟಿದ್ದಾರೆ. ಎಲ್ಲರಿಗೂ ಚಿರಋಣಿ. ಈ ಬರಹವು ಎಲ್ಲ ಕಲಾವಿದರಿಗೂ ಅರ್ಪಿತವಾಗಿದೆ.

-ಅ
07.06.2008
11.25AM

6 comments:

  1. Adbhuta, Arun. Odi nostalgia kaDalalli muLugihogbitte. Thanks for this.

    SPB-Salman combination yaako matte yaaru try maaDle illa. Ond thara channagi serittu joDi. Geeta Dutt-dantu siri kaNTHa.

    Lack of heroine-singer combinations bagge channagi bardidira. Idakku kudos.

    ReplyDelete
  2. hey ... super collation...
    aa mile sur mera tumhaara bandaaglella naanu atte maatadkota idvi ... alli baro ella heroinegaligoo lata voice opputte anta :-)

    ReplyDelete
  3. ನಾನು ಹಳೆಯ ಹಾಡುಗಳನ್ನು ಇತ್ತೀಚೆಗಷ್ಟೇ ಕೇಳಲು ಶುರು ಮಾಡಿದವನು. ನೀನು ಬರೆದಿರುವುದರಲ್ಲಿ ಶೇ. ೮೦ ರಷ್ಟು ನನಗೆ ತಿಳಿಯದ ವಿಚಾರವಾಗಿತ್ತು. ಈ ಲೇಖನ ಓದಿ ಬಹಳ ವಿಷಯಗಳು ಗೊತ್ತಾದವು.

    ಚೆನ್ನಾಗಿ ಬರೆದಿದ್ದೀಯ. ಗೂದ್!

    ReplyDelete
  4. [ಶ್ರೀಕಾಂತ್] ಒಂದಷ್ಟು ಪುಸ್ತಕಗಳನ್ನು ಕೊಡ್ತೀನಿ, ನಿನ್ನ ಪರೀಕ್ಷೆಯೆಲ್ಲಾ ಆದಮೇಲೆ ಓದುವಂತೆ. ಅದ್ಭುತವಾಗಿವೆ. ಅಲ್ಲಾ, ಅದು ಇಲ್ಲಿ ಏನು ಪ್ರಸ್ತುತ ಅಂತ ಕೇಳ್ಬೇಡ.

    [ವಿಜಯಾ] ನನಗೆ ಎಷ್ಟೋ ಸಲ ಅನ್ನಿಸಿದೆ, ನಾನು ಇನ್ನೊಂದು ಮೂವತ್ತು ವರ್ಷ ಮುಂಚೆ ಹುಟ್ಟಿದ್ದಿದ್ದರೆ ಈ ಚಿತ್ರಗಳನ್ನೆಲ್ಲಾ, ಈ ನಟರನ್ನೆಲ್ಲಾ, ಥಿಯೇಟರಿನಲ್ಲಿ ನೋಡಬಹುದಿತ್ತು ಅಂತ.

    [ಅರ್ಜುನ್] ಈ ಸಲ್ಮಾನ್ ಖಾನ್ ಹೆಸ್ರು ಕೇಳ್ದ್ರೆ ಆಗಲ್ಲ ಕಣ್ರೀ. ಅವನಿಗೆ ಹಾಡೇ ಕೊಡ್ಬಾರ್ದು ನೋಡಿ. ಎಸ್.ಪಿ. ಕಂಠ ಅಪವಿತ್ರ ಆಗೋಯ್ತು.

    ReplyDelete
  5. sakhath paaTa gurugaLE...history paaTa andre heegirbeku nOdi ! atyadhbhutavaada niroopane.manojnate eddu eddu kunidu kunidu kaaNtide ! [;-) sumne haage ondh word-u...manojnate ! ;-)] nangantu ivarellara bagge enandre enandre enandre enoo gottirlilla, thanks tiLskoTTiddakke !

    ReplyDelete