Thursday, July 17, 2008

ಒಳ್ಳೆಯ ಕೆಟ್ಟವರು?

ರಾಜ್‍ಕುಮಾರ್ ತೀರಿಕೊಂಡಾಗಲೇ ಇವರು ಮಾತನಾಡಿದಾಗ "ಪಾಪ, ಈತಾನೂ ಎಷ್ಟು ಸೋತು ಹೋಗಿದ್ದಾರಲ್ಲಾ.." ಎಂದು ಮಾತನಾಡಿಕೊಂಡಿದ್ದೆವು. ಖಳನಾಯಕನಾಗಿ ಹೇಳಿ ಮಾಡಿಸಿದ ಎಂ.ಪಿ.ಶಂಕರ್ ನನಗೆ ಇಷ್ಟ ಆಗುತ್ತಿದ್ದು, ಮುಸುಕಿನ ಹಿಂದಿನ ಮನುಷ್ಯದ ಪಾತ್ರದಲ್ಲಿ. ಅಂಥಾ ಪಾತ್ರಗಳು ದಿನೇಶ್‍ಗೆ, ಅಥವಾ ಎಂ.ಪಿ.ಶಂಕರ್‍ಗೆ ಸಿಗುತ್ತಿತ್ತು! ಚಿತ್ರದ ಕೊನೆಯವರೆಗೂ ಆ ಮುಸುಕಿನ ಮನುಷ್ಯ ಯಾರು ಎಂದು ಗೊತ್ತಾಗದೆ, ಕೊನೆಗೆ ಹೀರೋ (ಅದು ರಾಜ್‍ಕುಮಾರೇ..) ಜೊತೆ ಗುದ್ದಾಡುವಾಗ ಮುಸುಕು ಕಳಚಿ, "ನೀನಾ?!!!" ಎನ್ನುವ ಪಾತ್ರದಲ್ಲಿ ಎಂ.ಪಿ.ಶಂಕರ್ ಅದೆಷ್ಟು ಸಲ ಕಾಣಿಸಿಕೊಂಡಿದ್ದಾರೋ ಏನೋ.

ಸತ್ಯಹರಿಶ್ಚಂದ್ರದ ಇವರ ವೀರಬಾಹುಕನ ಪಾತ್ರವು ಈಗಾಗಲೇ ದಂತಕಥೆಯಾಗಿದೆ. ಚಿಕ್ಕಂದಿನಿಂದಲೂ ನನ್ನ ಮನಸ್ಸು ಮುಟ್ಟಿದ್ದ "ಹಾವು ಮುಂಗುಸಿ" ಹಾಡಿನ ರಾಮ ಲಕ್ಷ್ಮಣ ಚಿತ್ರವನ್ನು ನೀಡಿದ್ದು ಇವರೇ. ಆ ಕಾಲದಲ್ಲೇ ಕನ್ನಡದಲ್ಲಿ ಅಡ್ವೆಂಚರ್ ಚಿತ್ರಗಳನ್ನೂ ಮಾಡಿದ ಹೆಮ್ಮೆ ಕೂಡ ಇವರದೇ. ಅಂಬರೀಶ್ ನಟನೆಯ ಮೃಗಾಲಯ ಚಿತ್ರ ನಾನು ನೋಡಿದ ಪ್ರಥಮ ಚಿತ್ರವಂತೆ. ಬಂಗಾರದ ಮನುಷ್ಯದಲ್ಲಿ ದ್ವಾರಕೀಶ್ ಜೊತೆ ತಮಟೆಯನ್ನು ಹಿಡಿದುಕೊಂಡು ಕಿತ್ತಾಡುವ ದೃಶ್ಯ ಕಣ್ಣು ಮುಂದೆಯೇ ಇದೆ. ಪ್ರಾಣಿ, ಪಕ್ಷಿ, ಪ್ರಕೃತಿಯ ಬಗ್ಗೆ ಇವರಿಗಿರುವ ಪ್ರೀತಿಯ ಸಾಕ್ಷಿಯಾಗಿ ಇವರ ಚಿತ್ರಗಳು ಎದುರಿವೆ. ಗಂಧದ ಗುಡಿ, ಮೃಗಾಲಯ, ರಾಮ ಲಕ್ಷ್ಮಣ, ಎಲ್ಲವೂ ಅಷ್ಟೆ.

ನನಗೆ ಇವರ ಪಾತ್ರ ಬಹಳ ಇಷ್ಟ ಆಗಿದ್ದು "ರಾಜ ನನ್ನ ರಾಜ" ಚಿತ್ರದಲ್ಲಿ. ದಟ್ಟ ಹಳದಿ ಪ್ಯಾಂಟು, ಹೊಳೆವ ಕೆಂಪು ಶರ್ಟು ತೊಟ್ಟು, ಹಿಪ್ಪಿಯಂತೆ ಕೂದಲು ಬಿಟ್ಟು ಚಂದ್ರಶೇಖರ್‍ಗೆ ಬೆಂಬಲಿಗನಾಗಿ, ರಾಜ್‍ಕುಮಾರ್‍ರಿಂದ ಒದೆ ತಿಂದ ಪಾತ್ರ. ಚಿತ್ರದಲ್ಲಿ ಫೈಟಿಂಗ್ ತೋರಿಸುವುದೇ ಇಲ್ಲ. ಎಂ.ಪಿ.ಶಂಕರ್ ರಾಜ್ ಮೇಲೆ ಹಗ್ಗ ಬೀಸುವುದು, ಆ ಹಗ್ಗ ರಾಜ್‍ನ ಕಟ್ಟಿಹಾಕಿಬಿಡುವುದು. ಅಷ್ಟೇ! ಕ್ಯಾಮೆರಾ ಒಂದು ಸುತ್ತು ಹೊಡೆಯುವಷ್ಟರಲ್ಲಿ, ಹಗ್ಗವು ಎಂ.ಪಿ.ಶಂಕರ್ ಕೊರಳಿಗೆ ಸುತ್ತಿಕೊಂಡಿರುತ್ತೆ. ದರದರನೆ ಎಳೆಯುತ್ತಾ ಇರುವುದು ರಾಜ್!

ಚಿಕ್ಕವನಾಗಿದ್ದಾಗ ಇಂಥಾ 'ಫೈಟಿಂಗ್' ಚಿತ್ರಗಳ ಬಗ್ಗೆ ಬಹಳ ಆಸಕ್ತಿಯಿತ್ತು. ಫೈಟಿಂಗ್ ಇಲ್ಲವೆಂದರೆ ಆ ಚಿತ್ರವನ್ನೇ ನೋಡುವ ಮನಸ್ಸಿರುತ್ತಿರಲಿಲ್ಲ. ಆದರೆ ಆಗ ವಿಲ್ಲನ್‍ಗಳನ್ನು ಶಪಿಸುತ್ತಿದ್ದೆ, ವಿಲ್ಲನ್ನುಗಳು ಕೆಟ್ಟವರೆಂಬ ಭಾವನೆಯಿಂದ. ಇದು ಆ ವಿಲ್ಲನ್ನುಗಳ ಸಾಧನೆಯೇ. ನೋಡುಗನು "ಓಹ್, ರಾಜ್‍ಕುಮಾರ್ ಒಳ್ಳೆಯವರು, ಎಂ.ಪಿ.ಶಂಕರ್ ಕೆಟ್ಟವರು" ಎಂದುಕೊಳ್ಳಬೇಕಾದರೆ ಅವರ ಅಭಿನಯದ ತಾಕತ್ತು ಹೇಗಿರಬೇಕು!! ಈಗ ಅಂಥಾ ಒಬ್ಬ ಅದ್ಭುತ ವಿಲ್ಲನ್ ತೀರಿಕೊಂಡಿದ್ದಾರೆ. ಚಿತ್ರರಂಗದ ಸೇವೆಗೆ ಅವರಿಗೆ ಅಭಿನಂದನೆಗಳು.

(ಅವರ ಫೋಟೋ ಸಿಗಲಿಲ್ಲ.. ಇಂಟರ್‍ನೆಟ್‍ನಲ್ಲಿ.. :-(... )

-ಅ
17.07.2008
8.15PM

3 comments:

  1. Here is a link for his photo... high resolution illa...aadre id sikidde hechu...

    http://www.chitraloka.com/photo_storage_2007/shankar_mp_cancer_3_07.jpg

    ReplyDelete
  2. nija gurugaLE, avarige oLLeya parisara kaalAji ittu. avaru daivaadhInaraagiddakke naanoo vishaadisuttene.

    ReplyDelete
  3. howdu ... MP Shankar super ... keliddu sullagabahudu, nodiddu sullagabahudu ... nidhaanisi yochisidaaga ....... yentha haadalwa?

    ReplyDelete