Sunday, April 12, 2009

ಮದುವೆಗೋ ಮಸಣಕೋ?

ಇಂದಿಗೊಂದು ವರ್ಷದ ಹಿಂದೆಯಿದ್ದ ಓಡಾಟವೇ ಬೇರೆ!
ವಿದ್ಯೆಗೋ, ಅಂಧನಿಗೋ, ರೋಗಿಗೋ, ವೈದ್ಯನಿಗೋ ಒಪ್ಪಿಸಲು -
ದೇಹವನ್ನು ಒಪ್ಪಿಸಲು -
ಅಲೆದಾಡುತ್ತ,
ಕೊನೆಗೆ ಕಲ್ಲೆದೆಯ ಶಿಲೆಯಾಗಿ ಅಗ್ನಿಒಪ್ಪಿಸಲು ಇದ್ದ ಓಡಾಟವೇ ಬೇರೆ!

ಓದ ಬಯಸುವವಗೆ ಪುಸ್ತಕದಿ ನೆರವಾಗಲು, ಹಸಿದವನಿಗೆ ಅನ್ನ ಬಡಿಸಲು, ದಣಿದವನಿಗೆ ಬೊಗಸೆ ನೀರುಣಿಸಲು
ಒಳಿತನ್ನೆಸಗಲು,
ಜನುಮದ, ಆತುಮದ ಹಂಗೇಕೆ? ಪಾಪ ಪುಣ್ಯದ ಭೀತಿಯೇಕೆ? ದೈವಾಧ್ಯಕ್ಷದ ಕಟ್ಟುಕಥೆಯೇಕೆ?
ಪುಣ್ಯವಿರಲಿ ಬಿಡಲಿ, ಜನುಮವಿರಲಿ ಬಿಡಲಿ ಒಳಿತನ್ನು ಮಾಡುವುದು ಧರ್ಮ!
ಪಾಪವಿರಲಿ ಬಿಡಲಿ ಹುಸಿಯ ಹಾದಿಯ ಪಯಣವು ಅಧರ್ಮ!!
ಬೂದಿಯೋ, ಮಣ್ಣೋ, ಆಹಾರವೋ ಆಗುವುದಷ್ಟೆ ನಮ್ಮ ಅಂತಿಮ ಭವಿಷ್ಯ
ಅಷ್ಟರೊಳಗೆ ಒಳಿತಿನ ಬದುಕೊಂದೆ ಅವಷ್ಯ.
ನಡತೆಯೊಂದರಲ್ಲೆ ಎಲ್ಲ ಪಾಠ ಹೇಳಿಕೊಟ್ಟ ಜೀವ ಮಲಗಿತ್ತು ಮೌನದಲ್ಲಿ.
ಆ ಓಡಾಟವೇ ಬೇರೆ.

ಕಾಲು ಶತಮಾನಗಳು, ಕಾಲ ಸರಿದಂತೆ
ನನ್ನ ಪ್ರಶ್ನೆಗಳಿಗೆ ಎಣೆಯಿಲ್ಲ.
ಪುರಾಣ, ಶಾಸ್ತ್ರ, ಶ್ರುತಿ, ರಾಜಕೀಯ,
ಜ್ಞಾನ, ವಿಜ್ಞಾನ, ಹಿಂದಿ ಸಿನಿಮಾ, ಬೆಂಗಳೂರಿನ ಗೂಂಡಾಗಿರಿ,
ಚರಿತ್ರೆ, ಪ್ರಯಾಣ, ಸಕ್ಕದ, ಸಾಹಿತ್ಯ - ಎಷ್ಟು ಪ್ರಶ್ನೆಗಳೋ ನನ್ನಲ್ಲಿ ಅಷ್ಟು ಉತ್ತರವಿತ್ತು ಅಲ್ಲಿ.
ಅಂದು ನನ್ನಲ್ಲಿದ್ದ ಒಂದೇ ಪ್ರಶ್ನೆ, ಇಷ್ಟು ಅವಸರವೇನಿತ್ತು?
ಅದಕ್ಕೂ ಮೌನದಲ್ಲೇ ಉತ್ತರ - ಯಾವಾಗ ಹೋಗಬೇಕೋ ಆಗ ನೀನೂ ಹೋಗಬೇಕು!
ಆ ಓಡಾಟವೇ ಬೇರೆ!

ಒಂಟಿಯೆಂದು ಜರಿದಿದ್ದರಂತೆ ಹಲವರು ಹಿಂದೆ.
ಬಿಡಿ ಬಿಡಿ ಸ್ವರಗಳನ್ನು ಕೂಡಿಸಿ ರಾಗ ಸಂಯೋಜಿಸುವಂತೆ
ಧಾರೆಯೆರೆದು ಸಕಲ ಚೈತನ್ಯವನ್ನು ನಮ್ಮೆಲ್ಲರಿಗೆ
ಬಾಳ ಪಯಣಕೆ ಹಾದಿ ತೋರಿರಲು
ಒಂಟಿ ಹೇಗೆ? ಬುದ್ಧಿಹೀನರು ಜನರು!!
ಇಂದು ನೀನಿಲ್ಲವಾದರೂ ನೀ ತೋರಿದ ದಾರಿಯಲ್ಲಿಯೇ ನಮ್ಮ ಪಯಣ!
ಅಂದಿನಾ ಓಡಾಟವೇ ಬೇರೆ!
ನೀ ತೋರಿದ ದಾರಿಯಲ್ಲಿಯೇ
ಇಂದಿನೀ ಓಡಾಟವೇ ಬೇರೆ!!

ಒಂದು ವರ್ಷ ಸಂದಿದೆ, ಮತ್ತೆ ವಸಂತ ಬಂದಿದೆ!
ಇಂದಿನೀ ಓಡಾಟವೇ ಬೇರೆ.
"ಮದುವೆಗೋ ಮಸಣಕೋ ಹೋಗೆಂದ ಕಡೆಗೋಡು"
ಎಂದು ಓಡುತಿರುವೆನು.
ನಿನ್ನ ಹಾದಿಯಲ್ಲಿ.
ನಿನ್ನ ಬೆಳಕಿನ ಹಾದಿಯಲ್ಲಿ.

-ಅ
12.04.2009
12AM

5 comments:

  1. :-( keys kaanstilla ... :-)

    ReplyDelete
  2. I heard that today is your marriage!!
    Wish a very happy married life!!!

    ReplyDelete
  3. eethara bardre artha aagutte..illandre aagavalladu...

    ee lines thumba hiDisthu..
    ಪುಣ್ಯವಿರಲಿ ಬಿಡಲಿ, ಜನುಮವಿರಲಿ ಬಿಡಲಿ ಒಳಿತನ್ನು ಮಾಡುವುದು ಧರ್ಮ!
    ಪಾಪವಿರಲಿ ಬಿಡಲಿ ಹುಸಿಯ ಹಾದಿಯ ಪಯಣವು ಅಧರ್ಮ!!

    ReplyDelete