Sunday, August 9, 2009

ವಯಸ್ಸು

"ಚಿಕ್ಕಿ, ಈಗ ನಿನ್ನ ವಯಸ್ಸೆಷ್ಟು?"
"ಗೊತ್ತಿಲ್ಲ.
ಐನೋರು ಹೊಲಕ್ಕೆ ಹೋಗುತ್ತಿದ್ದ ಕಾಲ
ಅಂತೆ - ಆಗೆನಗಿನ್ನೂ ಐದು!
ಇಲ್ಲೇ ಸಮಯವ ತಳ್ಳಿರುವೆ ನಾನು
ಇಲ್ಲೆ - ನಿಮ್ಮ ಮನೆಯೊಳಗೆ ಗೇಯ್ದು!"

"ಅಪ್ಪ, ಈಗ ಚಿಕ್ಕಿಯ ವಯಸ್ಸೆಷ್ಟು?"
"ಐನೋರೆಂದರೆ ನಮ್ಮಪ್ಪ.
ಹೊಲಕ್ಕೆ ಹೋಗುತ್ತಿದ್ದಾಗ ಅವರಿಗಿಪ್ಪತ್ತು!
ಸತ್ತಾಯ್ತಾಗಲೆ ಇಪ್ಪತ್ತು; ಸತ್ತಾಗಾಗಿತ್ತು ತೊಂಭತ್ತು!
ಭೇಷ್!
ತನ್ನ ಗಂಡನು ಹೋಗಿ ನಲವತ್ತಾದರೂ,
ಈ ವಯಸ್ಸಿನಲ್ಲೂ ಚಿಕ್ಕಿಯ ಉತ್ಸಾಹ,
ಬಾಳಿ ಬದುಕಬೇಕೆಂಬ ಸಾತ್ವಿಕ ದಾಹ!
ಅಜ್ಜಿಯಂತೆ ಜಗದೊಂದಿಗೆ ಈಕೆಯ ನೇಹ."

"ಅಜ್ಜಿ, ಈಗ ನಿನ್ನ ವಯಸ್ಸೆಷ್ಟು?"
"ಗೊತ್ತಿಲ್ಲ.
ಮದುವೆಯ ದಿನಕೆ ನನಗೆ ಎಂಟು,
ಇನ್ನೂ ಚಿಕ್ಕವಳಾಗ!
ಹನ್ನೆರಡಕ್ಕೆ ಮೈದಂಟು,
ನಾ ದೊಡ್ಡವಳಾದಾಗ!
ಹದಿನೈದಕ್ಕೆ ಮೊದಲ ಮಗು!
ಆಗಲೆ ಹುಟ್ಟಿತು ಬದುಕ ನಗು.
ಅವಳೇ ನಿನ್ನತ್ತೆ."

"ಅತ್ತೆ, ಈಗ ನಿನ್ನ ವಯಸ್ಸೆಷ್ಟು?"
"ನನಗೀಗೆಂಭತ್ತೈದು!"

-ಅ
04.08.2009
1.20PM

3 comments:

  1. ಈಗ ನಿಮ್ಮ ವಯಸ್ಸೆಷ್ಟು ಎಂದು ಕೇಳಬೇಕಾಗುತ್ತದೆ!

    ReplyDelete