Tuesday, August 17, 2010

ಅಂತರೀಕ್ಷಣೆ

ಕಣ್ಣಲಿ ಏನೋ ಧೂಳಿದೆ, ದಿಟ್ಟಿಯ
ಬಾಗಿಲು ಮುಚ್ಚುತಿದೆ.
ಎದುರಲೆ ಕಾಲನ ಘೀಳಿದೆ, ಕೇಳದೆ
ಅಹಮ್ಮು ಹೆಚ್ಚುತಿದೆ,
ಬದುಕೇ ಬೆಚ್ಚುತಿದೆ!

ಧೂಳಿನ ಶಪಥವು ಮುರಿಯಲು ಬಾಷ್ಪದ
ಮುತ್ತುಗಳುದುರುತಿವೆ.
ಮುತ್ತಿನ ದರ್ಪಣದಕ್ಷಯ ಹೊಳಪಲಿ
ಬಿಂಬವು ಚದರುತಿದೆ,
ಎದೆಯೋ ಬೆದರುತಿದೆ!

ಬಿಂಬದಿ ವರ್ಣದ ಕಿರಣಗಳೆಲ್ಲವು
ಒಂದನೆ ಹೇಳುತಿದೆ.
ತುಂಬಿದ ಮಡಕೆಯ ತೆರದಲಿ ಶಾಂತವು
ಜಂಭವ ಸೀಳುತಿದೆ,
ನಂಬುಗೆಯೇಳುತಿದೆ.

ಅಲೆಯುತ ಹೊಲೆಯಲಿ, ಕರೆಯುತ ಸೆರೆಯಲಿ
ಎಲ್ಲಿದ್ದೆನೊ ನಾನು?
ಧೂಳಿನ ಪರದೆಯ ಸರಿಸಲು ಹೃದಯದಿ
ಹುಟ್ಟಿರುವೆಯೊ ನೀನು,
ನೇಹವೆ ಸಿರಿಜೇನು!

-ಅ
17.08.2010
11 AM

No comments:

Post a Comment