Thursday, November 18, 2010

ಸತ್

ಅಪರಿಚಿತ ಹಿರಿಯರೊಬ್ಬರ ಕಾಲು
ಅಕಸ್ಮಾತ್ ತಾಕಿತು ಬಸ್ಸಲ್ಲಿ.
ಕಣ್ಗೊತ್ತಿಕೊಂಡೆವು ಇಬ್ಬರೂ, ಕಾಲ್ಮುಟ್ಟಿ.
ಪಾಪ ಪರಿಹಾರವಾಯಿತು.

ಬಲಗೈಯಲ್ಲಿ ಪೆನ್ಸಿಲ್ ಹಿಡಿದಿದ್ದ
ಒಂದನೇ ತರಗತಿಯ ಮಗುವೊಂದು
correction-ಗೆಂದು
ಪುಸ್ತಕವನ್ನು ಎಡಗೈಯಲ್ಲಿ ಕೊಡುವಾಗ,
ಬಲಗೈಯ ಬೆರಳೊಂದು ಸೋಕಿತ್ತು ಪುಸ್ತಕಕ್ಕೆ.
ಪುಸ್ತಕವು ಸುರಕ್ಷಿತವಾಯಿತು.

ಮೂರು ರಸ್ತೆ ಸೇರುವೆಡೆ ಬಿದ್ದಿದ್ದ
ಮೂರು ಮೆಣಸಿನಕಾಯಿ ಮತ್ತೊಂದು ನಿಂಬೆ ಹಣ್ಣನ್ನು
ಒದೆಯುವುದರಲ್ಲಿದ್ದೆ.
ಎಚ್ಚರದಿ ನೋಡಿ ದಾಟಿಬಿಟ್ಟೆ.
ಬಡಜೀವ ಬದುಕಿಕೊಂಡಿತು.

ಅತ್ತೆಮನೆಯ ಮೊದಲ ಹಬ್ಬದ ಊಟ ಮುಗಿದಿತ್ತು.
ತನ್ನೆಲೆಯ ತುದಿಯಲ್ಲಿ ಉಳಿದಿದ್ದ ಉಪ್ಪನ್ನು
ನೀರಲ್ಲಿ ಕರಗಿಸಿಬಿಟ್ಟಳು ನನ್ನತ್ತೆಯ ಮಗಳು.
ಋಣಮುಕ್ತಳಾದಳು.

-ಅ
18.11.2010
4.40PM