Monday, January 17, 2011

ಹೊಸ ವರ್ಷದ ಮೊದಲ ಸಂಜೆ

ಕತ್ತಲೆಗವಿಯಿತು ಹೊಸ ವರ್ಷದಲಿ
ಹಳೆಯ ನಿಯಮದಂತೆ.
ಕಪ್ಪಡರುತ್ತಿದೆ ಹೊಸ ಬಾನಿನಲಿ
ಮುಗಿದ ಯಾಮದಂತೆ.

ಹೊಸ ಗಾಳಿಯೊ ಹಳೆ ಸದ್ದನೆ ತರುತಿದೆ
ದೂರ ಬೆಟ್ಟದಿಂದ.
ಹಳೆ ದನಿ "ಹೊಸತೇನಿಲ್ಲವೊ" ಎನುತಿದೆ
ಘೋರ ಸಿಟ್ಟಿನಿಂದ.

ಕಪ್ಪೆಂದಿಗೆ ತಾನ್ ಕಳಚುವುದು?
ಹೊಸ ಬೆಳಕೆಂದಿಗೆ ಮೂಡುವುದು?
ಹಳೆ ಬೇರಿನ ಹಿರಿ ವೃಕ್ಷದ ಮೈಯ್ಯಲಿ
ಹೊಸ ಹಸಿರೆಂದಿಗೆ ಚಿಗುರುವುದು?
ಪ್ರೀತಿಯು ಭೀತಿಯ ನುಂಗಿದ ಒಡನೆಯೆ
ಹೊಸ ಹಕ್ಕಿಯು ತಾ ಹಾಡುವುದು!

-ಅ
01.01.2011
6.45PM

No comments:

Post a Comment