Wednesday, November 16, 2011

ಆಶ್ರಯ

ಬಾಗಿಲು ಮುಚ್ಚಿದ ಗುಡಿಯಂಗಳದಲಿ
ಮಲಗಿದೆ ಬೀದಿಯ ನಾಯಿ.
ಮನೆಮನೆ ತಿರುತಿರುಗುತ ಬಳಲಿದೆಯೋ
ಮುಚ್ಚಿದೆ ತನ್ನಯ ಬಾಯಿ.

ಮಲಗಿದೆ ಹನುಮನ ಗುಡಿಯಂಗಳದಲಿ
ನಡುಗುತಲೇ ಚಳಿಯಲ್ಲಿ.
ಹನುಮನ ಕಾವರೆ ಕಲ್ಲಭಿಷೇಕವ
ಎರೆಯುವರಯ್ಯೋ ಇಲ್ಲಿ.

ಹೊತ್ತಿಗೆ ಹೊಟ್ಟೆಗೆ ಕೊಟ್ಟಿಹ ದೇವನು
ಮರೆತನು ಪ್ರೀತಿಯ ಕೈಯಿ.
ಅನ್ನವ ನೀಡುವರೆಲ್ಲರು "ಹಚ ಹಚ"
ಮುರಿವರು ಅಯ್ಯೋ ಮೈಯಿ.

ಪ್ರೀತಿಯ ಕೈಯದು - ನಾಯಿಯ ಸೋಕದು
ಸೋಕಿರೆ ಪೂಜೆಯೆ ಹಾಳು.
ಪೂಜೆಯ ಪಡೆಯುವ ದೇವನು ಮೌನದಿ
ಉದ್ಧರಿಸುತನಿಹ ಬಾಳು.

ನೋವನು ತಾಳದೆ, ಶಪಿಸದೆ, ಕುಪಿಸದೆ,
ಹೊರಟಿತು ಬೀದಿಯ ನಾಯಿ.
"ಅನ್ನವ ಕೊಟ್ಟವರಿವರನು ಪೊರೆ ನೀನ್"
ಎಂದಿತು ಮುಚ್ಚುತ ಬಾಯಿ.

-ಅ
15.11.2011
8.30PM

No comments:

Post a Comment