Monday, April 23, 2012

ಗಾಳಿಪಟದ ಸುಖಿ

ಶಾಶ್ವತದೇರಿಳಿತಗಳನು ಒಂದೇ 
ತಾನದಿ ಹೊಮ್ಮಿಸುತಿಹ ಕಡಲಿನ ದಡ - 
ದಲ್ಲೇನೇನಿದು ಜನಸಾಗರವು! 
ಯಾವುದೊ ಜಗದಿಂದೀ ಜನಹೃದಯವ 
ತಣಿಸುತಲಿದೆ ಅಲೆಚಾಮರವು. 

ಗಾಳಿಯ ಸವಿಯುವ ಗುಂಪಿನ ಮಧ್ಯದಿ 
ಅಲೆಗಳ ನಡುವೆಯೆ ಮೈಮರೆವಂದದಿ 
ಮುದ್ದಿನ ಹುಡುಗನು ನಲಿದಿಹನು. 
ಸಂತಸವೆಂದರೆ ಏನೆಂಬುದ ನಾ 
ಹುಡುಗನ ಕಣ್ಣಲಿ ಕಂಡಿಹೆನು. 

ಹುಡುಗನು ಹಿಡಿದಿಹ ದಾರದ ಎಳೆಯಲಿ 
ಹಾರಲು ರೆಕ್ಕೆಯ ಜತೆಯನು ಕೂಡಿಸಿ 
ಗಾಳಿಯ ಪಟದಲಿ ಬೆರೆತಿಹನು. 
ಮೇಲಿನ, ಮೇಲಿನ ಆಗಸವನ್ನೇ 
ಮುಟ್ಟುತ ಭೂಮಿಯನಿಣುಕಲು ಸೊನ್ನೆ;
ಪಟವಾಗುತ ತಾ ಹಾರಿಹನು. 
ಈತನಿಗಿಂತಲು ಈ ಜಗದೊಳಗಡೆ 
ಶಾಶ್ವತ ಸುಖಿ ಇನ್ನಾರಿಹನು? 

-ಅ
09.04.2012
2.30AM 

No comments:

Post a Comment