Friday, June 15, 2012

ನಿಸರ್ಗದಡಿಯಲಿ

ಸೂರ್ಯನು ಮುಳುಗುವ ವೇಳೆಯಲಿ,
ಕೊಡಗಿನ ಹಸುರಿನ ಮಧ್ಯದಲಿ,
ಸೂರ್ಯನ ಮುತ್ತಿಗೆ ನಾಚುತಲಿ,
ಕೆಂಪಗೆ ಹರಿದಿತ್ತೊಂದು ತೊರೆ.

ಬೇಗೆಯು ತಾ ಮರೆಯಾಗುತಲೆ,
ಚುಮು ಚುಮು ಹಿಮವದು ಜಾರುತಲೆ,
ತೊರೆಯೊಳು ಕಾಲಿಳಿಬಿಟ್ಟಿರುವ
ಅವರಿಬ್ಬರ ಮನವಾಯ್ತು ಸೆರೆ!

ಸುತ್ತಲು ಬೆಟ್ಟದ ಕಾವಲಿರೆ,
ತೊರೆಯದು ಜೋಡಿಯ ಸೆಳೆಯುತಿರೆ,
ಕ್ಷಣದಲೆ ಇಬ್ಬರು ಮೈ ಮರೆಯೆ,
ನೀರಲಿ ಸುಧೆಯನು ಕಾಣುವರೆ?

ಅಮೃತದ ಸ್ನಾನದಿ ಹೊಳೆಯುತಿಹ
ಅವಳನು ಕಂಡವನೆಲ್ಲಿಹನು?
ಜಾರಿದ ಹಿಮ ನೀರಾಗುವವೊಲು
ತೊರೆಯೊಳು ತಾನವಳಲ್ಲಿಹನು!

ರವಿ ಮುಳುಗಿದ್ದನು;
ತೊರೆ ನಾಚಿತ್ತದು;
ಹಿಮ ಜಾರುತ್ತಲೆ ಅಮೃತವು ಹರಿಯಿತು!
ನೀರಲಿ ಹೊಳೆಯುತ
ಕಾಲವ ಬಯಸುತ
ಅವಳಾ ಮೈ ಮನ ನಾಕವ ಬೆರೆಯಿತು!

- ಅ
13.06.2012
8PM

2 comments: