Sunday, December 8, 2013

ನಾ ಬರುವ ದಾರಿಯಲಿ

 

ನಾ ಬರುವ ದಾರಿಯಲಿ ನಿತ್ಯವೀ ಪರಿಮಳವು

ನಿನ್ನ ನೆನಪನೆ ತರುವುದೆನ್ನ ಮನಕೆ;

ನೀನಿರದ ದಾರಿಯನು ನಡೆದಿಹೆನು ಎಷ್ಟೆಷ್ಟೊ

ಇಲ್ಲಿ ಮಾತ್ರವೆ ನಿನ್ನ ಜೊತೆಯ ಬಯಕೆ.

 

ಅಂದೆಂದೊ ಅಲ್ಲೆಲ್ಲೊ ನಾವಿಬ್ಬರೇ ಆಗ

ಈ ಹೂವಿನಾ ಘಮವೆ ಅಂದು ಇತ್ತು.

ಕಾಣದೆಯೆ ಗಂಧವನು ಚೆಲ್ಲುತ್ತಲೀ ಹೂವು

ನೀನದರ ಜೊತೆಜೊತೆಯಲಿ ಈ ಹೊತ್ತು!

 

ನೀನಿಲ್ಲವೆನ್ನುವುದೆ ನಿಜವಲ್ಲವೆಂಬುದನು

ಈ ದಾರಿ ಪ್ರತಿದಿನವು ಸಾರುತಿಹುದು.

ಹಾದಿಯನು ಸಾಗುತ್ತ, ಪರಿಮಳವ ಮೀರುತ್ತ,

ನಾನಿಲ್ಲವೆನ್ನುವುದ ತೋರುತಿಹುದು!

 

ಈ ದಾರಿಯನು ಬಿಟ್ಟು, ಬೇರೆ ದಾರಿಯನರಸಿ

ಮರೆತೆನೆಂಬುವ ಸುಖದಿ ನಾ ನಡೆಯಲಾರೆ;

ಸೌಗಂಧವಿಲ್ಲದಿಹ ಆ ದಾರಿಯಲ್ಲೆಲ್ಲೊ

ನನ್ನೊಡನೆ ನಿನ್ನನೂ ಪಡೆಯಲಾರೆ!

 

- ಅ

08. 12. 2013

2.40 AM

1 comment: