Tuesday, October 20, 2015

ನೀನು - ನಾನು

ಕೊಲ್ಲು ನಿನ್ನ ನೀನು
ಕೊಲದೆ ಉಳಿಯಬಲ್ಲೆಯೇನು?
ನಿಲ್ಲು ನೆಲದಿ ನೀನು
ನಿಲದೆ ನಡೆಯಬಲ್ಲೆಯೇನು?
ಬದುಕ ಬಂಧನವದೆ ಬಾನು -
ದಾಟಬಲ್ಲೆಯೇನು ನೀನು?

ಮೂಕವಾಗು ಒಮ್ಮೆ
ಮಾತಿನಲ್ಲಿ ಏನು ಹಿರಿಮೆ?
ನರಕ ತೊರೆಯೊ ಒಮ್ಮೆ
ನರಕದಿಂದೆ ನಾಕದೊಲುಮೆ
ಮಾತೆ ನರಕ, ಮೌನ ನಾಕ-
ವರಿಯೊ ಇದರ ಮಹಿಮೆ.

ಏಕೆ ಎಂಬುದೇಕೆ?
ಉತ್ತರವದು ನಿನಗೆ ಬೇಕೆ?
ಬಯಕೆಯೇ ಶಲಾಕೆ
ನೀನೆ ಇರಿದುಕೊಳುವೆ, ಜೋಕೆ!
ತೊರೆದು ಪ್ರಶ್ನೆಯಾಸೆಯನ್ನು
ನಡೆಸು ಬಾಳ ನೌಕೆ.

ಕೊಲ್ಲು ನಿನ್ನ "ನಾನು".
ಕೊಲದೆ ಉಳಿಯಲಾರೆ ನೀನು.
ಗೆಲ್ಲು ಛಲದಿ ನೀನು
ಸೋಲೆಂಬುವ ಭಯವದೇನು?
ಗೆಲುವೆ "ನೀನು" ಸೋಲೆ "ನಾನು" -
ಆಗಲೊಂದೆ ನೀನು - ನಾನು!

- ಅ
20. 10. 2015
2.55 AM

No comments:

Post a Comment