Saturday, September 10, 2016

ಮುಕ್ತಕ

ಮುಂದೇನೆಂಬುವ ಸಂದೇಹವು
ಇಂದಿನ ನಗುವನ್ನೇ ನುಂಗಿದರೆ,
ಎಂದಿಗೆ ಬೆಳಗುವುದು, ನೀನೇ ಹೇಳು,
ನಂದಿಸಿದಾ ಹರುಷದ ಹಣತೆ?

ಒಳಿತನ್ನಾಡುವುದನೆ ಕೆಡುಕೆನೆ
ಒಳ್ಳೆಯ ತನಕೆಲ್ಲಿದೆ ಉಳಿಗಾಲ?
ಬಳಿಯಿರುವವರೆಲ್ಲರು ಹಗೆಯಾದರೆ
ಇಳೆಯಾಗದೆ ನರಕದ ಜಾಲ?

ಹೆಮ್ಮರವಾಗಲು ಸಸಿಯೊಂದನು
ಸುಮ್ಮನೆ ಗದರಿದರಾಗುವುದೇನು?
ನಂಬಿಕೆಯೆಂಬುವ ಸೀನೀರೆರೆದರೆ
ನೆಮ್ಮದಿಯದು ನಾಳಿನ ಬಾಳು.

ನಿನ್ನಾತುರಕ್ಕೆ ಜಗವು ನಡೆಯುವು -
ದೆನ್ನುವ ಭ್ರಮೆಯದು ನಿನಗೇಕೆ?
ತನ್ನ ನಿರ್ಣಯವು ನಿನಗೆ ನಿಲುಕುವುದೆ?
ನಿನ್ನ ಮಿತಿಯ ಮೀರಲು ಬಹುದೇ?

- ಅ
31. 08. 2016
3.45 AM

No comments:

Post a Comment